இப்போதைய   பொருளாதார  அமைப்பில் உங்களுடைய வருமானம்  3  காரணிகளில் தீர்மானிக்கப்படுகிறது.

1)  என்ன செய்து கொண்டிருக்கிறீர்கள்?

2) எவ்வளவு திறமையாகச் செய்து கொண்டிருக்கிறீர்கள்?

3) உங்களுக்கு மாற்றாக  வேறு யாரும் இல்லை என்ற நிலையை உருவாக்கியுள்ளீர்களா?   இந்த மூன்றும் தான் உங்கள் எதிர்கால வளர்ச்சியை நிர்ணயிக்கின்றன.

வாழ்வின் உச்சத்தை தொட்டவர்கள் எல்லாரும் தங்களது திறமைகளை மேம்படுத்தி, மேம்படுத்தி தன்னை உச்சபட்ச நிலைக்கு உயர்த்திக் கொண்டதால் தான்  அவர்கள் எதிர்பார்த்த வளர்ச்சி அடைய முடிந்தது, அதை  அடைய அவர்கள் எந்த விலையைக் கொடுக்கவும் தயங்கவில்லை,எந்த தியாகத்தைச் செய்வதற்கும்   அவர்கள் தயங்கவில்லை, நேரம் முழுவதையும் முதலீடு செய்யவும்  தயங்கவில்லை.

நம்மை விட யாரும் சிறந்தவர்கள் இல்லை,  நம்மை விட  யாரும் சுறுசுறுப்பானவர்கள் இல்லை. நமக்கு மாற்று யாரும் இல்லை என்ற நிலையை வளர்த்துக் கொள்ள வேண்டும்.எல்லா திறமைகளும், வியாபார நுணுக்கங்களும் கற்றுக் கொள்ளக் கூடியவை ஒரு திறமையோடு இன்னொரு திறமையை இணைத்துக் கொண்டு அதனையும்   அது சேர்த்து  வளர்க்கும்.

உங்களது துறையில் முதல் 10 இடத்தில்   உள்ள சிறப்பானவர்கள் பட்டியலில் உங்களது பெயரை பதிவு செய்ய வேண்டும் என்று கடுமையாக உழைத்தால் அது நடந்தே தீரும், அதைத் தடுக்க யாராலும் முடியாது. இது உடனடியாக  நடந்துவிடக்கூடிய காரியம் அல்ல. இதற்கு சில ஆண்டுகள்  கூட ஆகலாம். இது வரை சாதிக்காததை நீங்கள் சாதிக்க வேண்டும் என்றால், இதுவரை இல்லாத அளவு உங்களை முற்றிலுமாக மாற்றிக்  கொள்ள வேண்டும். கடுமையான உழைப்பும், அர்ப்பணிப்புடன் கூடிய ஈடுபாடும், உங்கள் திறமைகளை மெருகூட்டும்.

தங்களிடம் மறைந்துள்ள எந்தத்  திறமையை  இன்னும்  மேம்படுத்தக் கொள்ள வேண்டும்?  எந்த தொழில் நுணுக்கத்தைக் கற்றுக் கொள்ள வேண்டும்?  தொழில் பற்றிய எந்த ஆழமான செய்திகளைத்  தெரிந்து கொள்ள வேண்டும்? என்பதை   உணர்ந்து  அதன்படி செயல்பட  வேண்டும்.

இதன் காரணமாக  உங்களது  திறமைகள்  ஒரு குறிப்பிட்ட  அளவு வளர்ச்சியைப் பெற்று இருக்குமேயானால்  நீங்கள்  ஒரு கேள்வியைக் கேட்டுக் கொள்ள வேண்டும். நாம் மேன்மைப்படுத்திக் கொண்ட  திறமைகளில்  எந்தத் திறமை நமக்கு இந்த அளவுள்ள நல்ல பலனைத் தந்தது? என்று   கேளுங்கள், இதற்கான பதிலை நீங்கள் கண்டு பிடிக்க முடியாவிட்டால், “என்னிடமுள்ள எந்த திறமை என்னை இந்த அளவு உயர்த்தியது?  என்று, உங்கள் மேலாளரைக்  கேளுங்கள். அல்லது  உங்களுடன் பணிபுரிபவர்களை அல்லது உங்களுக்கு கீழ் பணியில்  இருப்பவர்களை கேளுங்கள், நண்பர்களிடமும்  அல்லது  உங்களது மனைவியிடமும்  கேளுங்கள்  அவர்கள் இதற்கான சரியான பதிலைத் தருவார்கள்.

கேள்விக்கு விடை  கிடைத்து  விட்டால் உங்களது  முழு  சக்தியையும் அந்தப் புள்ளியில் குவித்து அதை மேலும் வளர்த்துக் கொள்ளமுயற்சி செய்யுங்கள். உங்களுடைய ஒரு பலவீனமான பகுதிகளை பலப்படுத்திக் கொண்டால் மற்ற பலவீனங்களை எளிதாக பலமாக்கிக் கொள்ள வாய்ப்பு  கிடைக்கும்.

ஒன்றை நீங்கள் புரிந்துக் கொள்ள வேண்டும். சிலர்   பிறக்கும் போதே திறமையுடன்  பிறக்கிறார்கள். சிலர் முயற்சியின் மூலம்  திறமை அடைகிறார்கள்.   ஒரு ஆங்கில பழமொழி ஒன்று “எந்த திசையில் குதிரை ஓடுகிறதோ, அந்த திசையில், அதன் போக்கில்  பயணித்து, குதிரை ஓட்டம்  பழகுவது தான் சிறந்த   வழி” என்று சொல்வார்கள்,அதைப் போல உங்களிடம் புதைந்துள்ள  இயற்கைத் திறமை எதுவோ, அதை வைத்துக் கொண்டு  அதன் வழியிலேயே பயணித்துப் பழகுங்கள்,   வெற்றிகள் தானாக வந்து சேரும்.

இயற்கையாக அமைந்துள்ள திறமையை வளப்படுத்துங்கள். அதில் நுணுக்கங்களை மேன்மைப் படுத்த கடின உழைப்பு தேவைப்படுகிறது. சில திறமைகளும், நுணுக்கங்களும்  உங்களது உழைப்பாலும், நீங்கள் கற்றுத் தெளிந்த வழிமுறைகளினாலும்  உங்களை  வந்தடைகிறது.

உங்களுடைய வெற்றியை இரட்டிப்பாக்க அதற்குரிய  நுணுக்கத்தைப்  பெற முயற்சிசெய்யுங்கள். ஒவ்வொரு தொழில் நுணுக்கமும் கற்றுக் கொள்ளக் கூடியவை தெரிந்து கொள்ளக் கூடியவை, அறிந்து கொள்வதன் மூலமும், அனுபவத்தின் மூலமும் அதை மெருகேற்ற முடியும்.

இந்த இதழை மேலும்

• இணையதளத்தில் படிக்க

யானையினுள் எளிதாய் பாயும் வேலின் வலிமை மென் பஞ்சினில் பாயாது, என்பதும், வலிய இரும்பு கடற்பாறையால் பிளக்காத பாறை, எளிய மரத்தின் வேரினால் பிளவு படும் என்பதையும், எளிமையின் வலிமைக்கு சாரம் அம்சமாகவும் சான்றாகவும் கூறப்படும் உண்மை.

எளிமையான வரிகளையோ, வார்த்தைகளையோ, விளக்கங்களை யோ, எதையும் எளிதாய் புரிந்து கொள்ளும் புரிதலுக்கும் எளிமை தான் மிக முக்கியமாகிறது. ஆக, எளிமை என்பது, வாழ்க்கையை மிக எளிமையாக்கிறது. என்பது தான் வாழ்வியல் சக்தியம். ஆனால் எளிமை என்றதும்., நம் மனக்கண் முன் நிற்பது..

வறுமையின் பிரிதிபலிப்பு, வலிமையற்ற நிலையை சார்ந்தது. வரியவருக்கு உரியது.சமூக அந்தஸ்த்து இல்லாதது அனுபவிக்கத் தெரியாதவர்களின் அடையாளம் என்று தான். நமக்குள் எளிமையைப் பற்றிய அபிப்ராயமாக, தோன்றுகிறது. ஆனால் எளிமையால் வரும் வலிமை தரும் வெற்றி. நிலைத்தத் தன்மை கொண்டது என்பது, நமக்கு தெரியாத உண்மை. ஆனால் அனுபவப்பட்டவர்களுக்கோ சாத்தியம் இதற்கு சான்றுகளும், சான்றானவர்ளும் ஏராளம். எளிமை என்பது ஏளத்திற்குரியதல்ல. ஏற்றத்திற்கு ஏதுவானது. எதிர்ப்பு வரும் போது, வலிமையாவது. வெற்றியின் சாவியாக விடுதலையின் இனிமை இலக்கணமாக இருப்பது எளிமை.

வசதியற்று, பல இன்னல்களை கடந்து, பற்று, காசம், என்பவற்றை முழுமையாக புரிந்து கொண்டதன் மூலமே உள்ளார்ந்த எளிமையாக இருந்து பல திட்டங்களை, சீர்த்திருத்தங்களை  கொண்டு வர முடியும்.

எளிமை என்பது சிக்கனமல்ல. தேவையற்ற விரயத்தை தடுப்பது குறைந்த வசதியில், நிறைந்த திருப்தி அடைவதோடு, கர்வமில்லாது மற்றவர்களுக்கு நிறைந்த மனதோடு தருவது எளிமையின் உண்மை நிலைபாடு. அந்த அடிப்படையில் தான் காந்தியடிகளின் எளிமை அஹிம்சையை ஊட்டியது. சுதந்திரத்தை நாட்டியது. வள்ளலாரின் எளிமை அன்பைக் கூட்டியது. கர்ம வீரர் காமராஜர், கக்கன் அவர்களின் எளிமை, ஏழைகளுக்கு நல்வழி காட்டியது. அப்துல் கலாம் ஐயாவின் எளிமை ஆக்கப்பூர்வமான அறிவையும், மக்கள் அனைவரின் மனங்களையும் ஈர்த்து ஒற்றுமையைச் சேர்த்தது.

யாருக்காகவும், எதற்காகவும் வேஷம் போடாமல், தன்னிச்சையாக சுதந்திரமாக செயல்பட்டு சுய கௌரவம், சுயமரியாதை தன் மானம் இழக்காமலும், மற்றவர்களின் பார்வைக்கும் பாராட்டுக்கும், பகட்டுக்கும், போலி எளிமைத்தனம் இல்லாமலும் இருப்பதே, ஆக எளிமையின் அம்சங்கள் எளிமையாக இருக்க எந்த வித முயற்சியும், தேவையில்லாத போதும், சமுதாய மதிப்பை மனதில் கொண்ட எல்லோராலும் எளிமையை ஏற்றுக் கொள்ள முடிவதில்லை. எளிமை என்பது எளிதானது, இயல்பானது, பணிவானது அகங்காரமற்றது, குற்ற உணர்வற்றது அப்படிப்பட்ட எளிமையை மறைத்து, அதன் மீது பூசப்படும் மேல் பூச்சுதான் பகட்டு.

அந்த நிலையற்ற பகட்டை காப்பாற்றிக் கொள்ளத்தான். அதிக முயற்சியும், பயமும், போராட்டமும் தேவைப்படுகிறது. அந்தப்பகட்டை காப்பாற்றிக் கொள்ளும் முயற்சிதான் இன்றைய வாழ்க்கை முறையாகவே மாறிவிட்டது. அதே சமயம், நாம் பகட்டாய் வாழ்க்கை வாழ்வதற்கே  விரும்புவதாலும், எதிர்ப்பதாலூம் பிறரின் கவனத்தை ஈர்க்கும் முயற்சியால் தான், அதில் எவ்வளவு சிரமங்கள், கஷ்டங்கள் இருந்த போதும் எளிமையின் வலிமையை நம்மால் புரிந்து கொள்ள முடிவதில்லை.

இந்த இதழை மேலும்

• இணையதளத்தில் படிக்க

தங்கள் குழந்தைகள் ஆரோக்கியமாகவும் மகிழ்ச்சி யாகவும் இருக்கிறார்களா? என்பதை உறுதி செய்து கொள்வதே பெற்றோருக்கு முழு நேர வேலையாக இருக்கிறது. பெற்றோர்கள் தமது குழந்தைகளை வெற்று உடம்புடன் எந்தப் பாதுகாப்பும்  இல்லாமல் வெயிலில் திரிய அனுமதிப்பது இல்லை.

ஆனால் “கண்” என்று வரும் போது மட்டும் அவர்கள் கோட்டை விட்டு விடுகிறார்கள். குழந்தைகளின் கண்களுக்குப் பாதுகாப்பு அவசியம் என்பதை அவர்கள் ஏனோ உணர்வதில்லை. ஒரு சிலருக்கு மட்டுமே குழந்தைகளின் கண்களைப் புற ஊதாக்கதிரியக்கம் (UV rays) பாதிக்கும் என்ற உண்மை தெரிந்திருக்கிறது.

குழந்தைகள் வீட்டுக்கு வெளியே நிறைய நேரத்தைச் செலவழிக்கிறார்கள். அவர்கள் கண்கள் தொடர்ந்து புற ஊதாக்கதிர்களால் பாதிக்கப்படும் வாய்ப்பு அதிகம், பெரியோரை விட மூன்று மடங்கு அதிக கதிர்வீச்சில் 80 சதவீதம் கதிர் வீச்சை அவர்கள் 18 வயதுக்கு முன்ன தாகவே சந்தித்து விடுவதாக மதிப்பிடப்பட்டுள்ளது.

சூரிய ஓளியில் அதிகமாகத் திரிவதால், குழந்தைகளுக்கு கண்புரை, மாகுலர் டிஜெனரேசன் (Macular degeneration) ஆகிய நோய்கள் ஏற்படும் வாய்ப்புகள் அதிகரிக்கின்றன. உலகம் முழுவதும் ஓர் ஆண்டுக்கு கண்புரையால் பார்வை இழப்போர் 1.6 கோடி என உலக சுகாதார நிறுவனம் மதிப்பிட்டுள்ளது. (இதில் 20 சதவீதம் புற ஊதாக் கதிர்களின் தாக்கத்தால் ஏற்படுபவை)

கண்களைக் கூசச் செய்யும் பிரகாசமான ஓளி பார்வையைப் பாதிக்கும், கண்களில் அசதி, அசவுகரியம் ஆகியவை ஏற்படும். ஒரு குழந்தையின் பார்வை சிறப்பாக அமைய, இந்த கண்களைக் கூசும் பிரகாசமான ஓளியில் இருந்து காப்பது அவசியம். அப்போது தான் தினசரி வேலைகளை வீட்டுக்கு உள்ளேயும், வெளியேயும் சிறப்பாகச் செய்ய முடியும்.

பிரகாசமான ஓளி வகைகளையும், அதில் இருந்து குழந்தைகளைப் பாதுகாக்கும் வழிமுறைகளையும் இங்கே பார்க்கலாம்.

கண்ணைக் கூசச் செய்யும் ஒளி வகையில் சிதறடிக்கும் ஓளிக்கு அதிக முக்கியத்துவம் உண்டு. இந்த வகையானது கண்ணின் லென்சில் பிரதிபலிக்கிறது. கணினியைப் பயன்படுத்தும்போது லென்சுக்கு முன், பின் பிரதிபலிக்கும் ஓளி கண்களுக்கு பாதிப்பை ஏற்படுத்துகிறது.

இதில் லென்சின் வெளிப்பரப்பில் வெளிச்சம் பிரதிபலிப்பது மங்கலான பார்வைக்கு வழி வகுத்துவிடும். இரவில் “ஹெட்லைட்” அல்லது தெரு விளக்குகள் மூலம் கண்ணின் லென்சுக்குள்ளேயே இரட்டை பிரதிபலிப்பு ஏற்படக்கூடும். இந்த பாதிப்பில் பார்க்கும் பொருட்கள் இரண்டாகத் தெரியும்.

அனுதினமும் பிரகாசமான வெளிச்சத்தை கண்கள் சந்திக்கும் போது அது கண்களுக்குப் பாதிப்பை ஏற்படுத்துவதாக அமைந்து விடுகிறது. பைக்கில் செல்லும் போது, பள்ளியில் விளையாடும் போது, விளையாடு வதைக் கவனிக்கும் போது மிகவும் வெளிச்சமான சூழலைக் கண்கள் எதிர்கொள்ள வேண்டியதாகிறது. இதனால் கண்கள் அதை இயல்பாக ஏற்றுக் கொள்ளாத நிலைக்குள்ளாகிறது.

மதிய வேளையில் பள்ளிக்கு குழந்தைகள் வீட்டுக்கு நடந்து வரும்போது, உச்சியில் இருக்கும் சூரியனின் கடுமையான வெப்பக் கதிர்களின் தாக்குதலுக்கு உள்ளாக நேரிடும்.

கடற்கரை அல்லது குளத்தில் விளையாடுதல், பனியில் விளையாடுதல் போன்ற சூழ்நிலையில் கண்களைக் கூச வைக்கும் அளவுக்கு ஓளியின் ஆக்கிரமிப்பு ஊடுருவுகிறது. இந்த நிலை முடிவில் கண்ணில் பார்வையிழப்பு என்ற விபரீத நிலையில் கொண்டு விட்டு விடும்.

வெளிச்சம் மூலம் நேரும் பாதிப்புக்கேற்ற விதத்தில் அதற்கான லென்ஸ்கள் அணிந்து கண்களைப் பாதுகாத்துக் கொள்ள முன் வர வேண்டும். பாலிகார்பனேட் கொண்டு தயாரிக்கப்படும் போட்டோ குரோமிக் லென்ஸ்கள் (PhotoChromic Lens) குழந்தைகளுக்கு ஏற்றவை. இவை எடை குறைவானது. எந்த பிரேமுக்கும் இதைப் பொருத்த முடியும். புற ஊதாக் கதிர்களின் அளவுக்கு ஏற்ப போட்டோ குரோமிக் லென்ஸ் சாதாரணக் கண்ணாடியாகவும், குளிர் கண்ணாடியாகவும் தம்மை மாற்றிக் கொண்டு சிறப்பாகச் செயல்படும். மிக மிக இருட்டான பகுதிக்குப் போகும் போது சாதாரண கண்ணாடியாகவும், கண்ணைக் கூசும் பிரகாசமான ஓளியில் குளிர் கண்ணாடியாகவும் மாறி, ஒளியின் பாதிப்பைக் குறைத்துத் தெளிவாகப் பார்க்க இவ்வகை போட்டோ குரோமிக லென்ஸ்கள் உதவுகின்றன.

இந்த இதழை மேலும்

• இணையதளத்தில் படிக்க

கோயம்புத்தூர் துணிவணிகர் சங்க அரசு மகளிர் மேல்நிலைப் பள்ளி  மிகவும் பழமை வாய்ந்த பள்ளி. பள்ளியின் சார்பிலிருந்து விளையாட்டிற்கு மிகுந்த உதவிகளைச் செய்து வருகிறார்கள். நிறைய விளையாட்டுக்களுக்குப் பள்ளி முக்கியத்துவம் அளித்து வருகிறது. ஒவ்வொரு விளையாட்டுக்கும் தனித்தனியாகப் பயிற்சியாளர்களை அமர்த்தி விளையாட்டினை மேம்படுத்தி வருகிறது. இப்பள்ளியானது கல்வியை மட்டுமே முதன்மை நோக்காகக் கொண்டு செயல்படாமல் விளையாட்டிற்கும் முக்கியத்துவ மளிப்பது கருதக்கூடிய ஒன்றாகும்.  முன்னாள் தலைமை ஆசிரியராக இருந்த திரு. சந்திரசேகர் மற்றும் தற்பொழுது தலைமை ஆசிரியராகப் பணியாற்றி வரும் திருமதி. மணியரசி அவர்களும் நிறைய உதவிகளை இப்பள்ளிகளுக்கு செய்து கொடுத்திருக் கிறார்கள்.

மாணவிகளின் கூடுதல் உழைப்பின் காரணமாக கூடைப்பந்தில் மாநில அளவிலான கோப்பையினை வென்று தற்பொழுது தேசிய அளவிலான கோப்பையை வெல்வதற்காகத் தயாராகிக் கொண்டிருக்கின்றனர். இத்தகைய வெற்றி வாய்ப்பைத்  தொடர்ந்து முழு நேர உழைப்பில் ஈடுபட்டுக் கொண்டிருக்கும் 9 மற்றும் 10-ம் வகுப்பு பயின்றுவரும் மாணவிகள் ஸ்ரீலட்சுமி, தனுஸ்ரீ, சந்தியா இவர்களின் கூடுதல் முயற்சியால் கிடைத்த வெற்றி, அந்த வெற்றிக்காக அவர்கள் உழைத்த கடின உழைப்பு. அவர்களால் பள்ளிக்கு கிடைத்த பெருமைகள் போன்றவற்றை நம்மிடையே பகிர்ந்துகொண்டனர்.

வணக்கம். என் பெயர் பா. ஸ்ரீலட்சுமி. நான்  9-ம் வகுப்பு பயின்று வருகிறேன். என் அப்பா தங்கப்பட்டறையில் கூலி வேலை செய்து வருகிறார். என் அம்மா கவிதா இல்லத்தரசியாக உள்ளார். எனக்கு உடன் பிறந்த ஒரு தங்கை இருக்கிறாள். அவள் பெயர் ஸ்ரீராஜலட்சுமி. ஏழாம் வகுப்பு படித்து வருகிறாள். எங்கள் குடும்பம் பொருளாதார அடிப்படையில் மிகவும் பின்தங்கிய குடும்பம். இத்தகைய சூழ்நிலையில் இருந்து நான் வெற்றி பெற்றதைப் பெருமையாகக் கொள்கிறேன். நான் கடந்த மூன்று வருடங்களாக கூடைப் பந்தின் மீது ஆர்வம் கொண்டு தொடர்ந்து விடா முயற்சியுடன் விளையாடி வருகிறேன். நான் தற்பொழுது  மாநில அளவில் கலந்து கொண்டு கோப்பையை வென்றிருக்கிறேன். தேசிய அளவிலான போட்டியில் கலந்து கொள்ள என்னைத் தயாராக்கிக் கொண்டிருக்கிறேன். நிச்சயம் தேசிய அளவிலும் கலந்து கொண்டு வெற்றி பெறுவேன் என்று நம்புகிறேன். நான் தனியாக வீட்டில் பயிற்சி எதுவும் மேற்கொள்வதில்லை. அதற்கான வசதிகளும் எங்களிடம் இல்லை. நான் முழுக்க முழுக்க பள்ளியிலேயே என் பயிற்சியை முடித்து விடுவேன். தினமும் காலை 6 மணிமுதல் 9 மணி வரையிலும் மாலை 3 மணியிலிருந்து 5 மணி வரையிலும் பயிற்சி செய்வேன். என்னை முழுவதும் ஊக்குவித்தவர்கள் எனது பயிற்சியாளர் பிரபு மற்றும் எனது பெற்றோர். இந்த தருணத்தில் அவர்களுக்கு எனது நன்றியைத் தெரிவித்துக் கொள்கிறேன். நான் தற்பொழுது இந்தியன் பி பிரிவில் தேர்வு செய்யப்பட்டதும் கூடுதல் மகிழ்ச்சியினை அளிக்கிறது.

இந்த இதழை மேலும்

• இணையதளத்தில் படிக்க

ஆயக்கலைகள் அறுபத்து நான்கு என்பர். இவற்றில் ஓவியக்கலையும்  ஒன்று. கவிஞன் என்பவன் ஒரு மந்திரவாதி போன்றவன், தன் மந்திரக்கோலால் அவனுடைய கவிதைகளை வாசிப்பவர்கள் மனதில் தான் சொல்ல வந்த விபரங்களை உருவாக்கி விடுவான். ஆனால் ஒரு ஒவியன் அவற்றை தன் தூரிகையால் ஓவியமாய் உருவாக்கி அவை என்றென்றும் அனைவரும் தன் கண்களால் பார்த்து உயிரோவியமாய் இருக்கும் படி செய்து விடுகின்றான். உலகின் மிகச்சிறந்த ஓவியர்களில் ஒருவர் ரவிவர்மா ஆவார்.

ரவிவர்மா அவர்கள் ஏப்ரல் மாதம் 29 ம் தேதி 1848 ம் ஆண்டு கேரளாவின், திருவாங்கூரில் கிளிமானூர் அரண்மனையில் பிறந்தார்.இவரது தந்தை நீலகண்ட பட்ட திரிபட், இவரது தாயார் உமாம்பா தம்புராம்டி ஆவார். இவர் சமஸ்கிருதம், மலையாளம் மொழிகளைக் கற்றதோடு, ஓவியம் வரைவதிலும்  அதிகம் நாட்டம் கொண்டார். அவர், அங்கிருந்த அரண்மனை சுவரில் கரித்துண்டு ஓவியம் வரைவதை கவனித்த அவருடைய ராஜா ராஜா வர்மா, அவரை திருவாங்கூர் அரண்மனை ஓவியர் ராமசாமி நாயுடுவிடம் அழைத்துச் சென்றார் அவர்,ரவிவர்மாவிற்கு தண்ணீர் ஓவியம் கற்றுத் தந்தார். பின் 1868ல் ரவிவர்மா ஆங்கிலேய ஓவியர் தியோடா ஜென்சன் மூலம் எண்ணெய் ஓவியம் கற்றுக்கொண்டார். இவருக்கு ராஜா என்ற அடைமொழி அப்பொழுது அங்கு வைஷ்ராயாகவும், கவர்னர் ஜெனரலாக இருந்த ஆங்கிலேயர் அளித்த பட்டமாகும். அவர் தனது 18 ம் வயதில் 12 ம் வயது பாகீரதியை மணந்து கொண்டார். இவர் வழித் தோன்றியவர்கள் இன்றும் திருவாங்கூர் அரண்மனையில் வாழ்ந்து வருகின்றனர். மூன்றாம் பலராமவர்மா, மூன்றாம் மார்த்தாண்ட வர்மன், ஏழாம் ராம வர்மா ஆகியோர் ரவிவர்மாவின் வழித்தோன்றியவர்களே.

இவரது ஓவியத்தின் சிறப்பு என்னவென்றால், தம்முடைய பாரம்பரிய முறையுடன் ஐரோப்பிய ஓவியக்கலையையும் கலந்து உருவாக்கியதால் உலக அளவில் பாராட்டப்பட்டது. இவர் தென் இந்தியப் பெண்களை, இந்து மதத் தெய்வங்கள் வடிவில் ஓவியம் வரைந்தார். தன்னுடைய சகோதிரிகளையும் ஓவியமாக வரைந்துள்ளார். மும்பையில் வசித்த மகாராஷ்டிரப் பெண்களையும் ஓவியங்களாக வரைந்துள்ளார். இவர், மகாபாரதம், இராமாயணம் ஆகிய இதிகாசங்களில் உள்ள சில முக்கியமான ஓவியங்களாக வரைந்து அனைவரது கவனத்தையும் தன் பக்கம் திருப்பினார். அவற்றில் குறிப்பிடத்தக்க ஓவியங்கள் முறையே

பெண் தன் நினைவுகளில் தொலைந்த ஓவியம்

தமயந்தி அன்னப்பட்சியுடன் உறவாடும் ஓவியம்

சகுந்தலாவிற்கு துஷ்யந்தன் கடிதம் எழுதும் ஓவியம்

யசோதா கண்ணனை அலங்காரம் செய்யும் ஓவியம்

கிருஷ்ணன் தூதுவனாகச் செல்லும் ஓவியம்

திரௌபதியின் அபயக்குரலில் மன்றத்தில் இருக்கும் ஓவியம் ஆகும். இவற்றின் மூலம் இவர் வீரஸருங்கலா என்ற பட்டத்தைப் பெற்றார். 1873 ல் சென்னையில் நமந்த ஓவியக்கண்காட்சியில் இவரது ஓவியம் முதல்பரிசைப் பெற்றது. 1873 ல் வியன்னாவில் நடந்த ஓவிய கண்காட்சியில் இவரது ஓவியம் சிறந்த ஓவியமாகக் கருதப்பட்டதால் இவரது புகழ் உலகமெங்கும் பரவும் படியானது.

கேரள அரசாங்கம் கலைகளில் சிறந்தவர்களை ஒவ்வொரு ஆண்டும் ராஜாரவிவர்மா புரஸ்காரம் என்று அவர் பெயரில் விருதை வழங்கி அவரை நினைவு கொள்கின்றது. மவேளிகராவில், ரவிவர்மா அவர்களின் பெயரில் கலைக்கூடம் உள்ளது. பலகலாச்சார அமைப்புகளும், பள்ளிகளும் இவரது பெயரில் இன்றும் இயங்கி வருகின்றது. இவரது 65 வது நினைவு நாள் அன்று இந்தியாவின் தபால் துறை இவருடைய உருவத்தையும் அவர் தீட்டிய தமயந்தியும் அன்னப்பறவையும் ஓவியத்தையும் தபால் தலையாக வெளியிட்டு அவரைப் பெருமைப்படுத்தியது. 1904 ம் ஆண்டு வைஷ்ராய் ஹர்சன் ஆங்கிலேய பேரரசரின் பெயரில் கெய்சர் ஹிண்ட் தங்க பதக்கத்தை வழங்கிப் பெருமை படுத்தினார். வர்மா அவர்கள் அக்டோபர் 2, 1906 ல் தனது 58 வது வயதில் இயற்கை எய்தினார்.

இந்த இதழை மேலும்

• இணையதளத்தில் படிக்க

இலட்சிய வீரர்களே

கடமை கசந்து விட்டதுவிட்டதா செயல்பாட்டில் ஈடுபாடில்லையா?

உலகில் எத்தனை கோடி பேர் வந்தார்கள்? எத்தனை பேர் வரலாற்றில் உள்ளார்கள். வந்தவரெல்லாம் வரலாற்றில் நிலைத்து நின்றிருந்தால் இந்த வரலாறு தான் என்னாவது? இந்த சரித்திரத்திற்கு சக்தி ஏது? மதிப்பேது? வந்தவரெல்லாம் வென்றிருந்தால் வெற்றிக்கு மதிப்பேது.

உடனடியாக -விரைவில்- எளிதில் கிடைத்துவிடுவது வெற்றியல்ல. வெற்றி அவ்வளவு எளிதாக இதுவரை யாருக்கும் கிடைத்ததில்லை.

அறிவும், தெளிவும், துணிவும், தெரிவும், வீரமும், விவேகமும், விழிப்பும், திறமையும் எந்த ஒரு இளைஞனிடம் ஸ்தம்பிக்கின்றதோ அந்த இளைஞனால் எதையும் சாதிக்க முடியும். அவனிடம் பல வெற்றிகள் காணப்படும். அந்த இளைஞனால் சாதிக்க முடியாதது எதுவும் உலகில் இல்லை இருக்காது. இருக்கவும் முடியாது.

ஒவ்வொரு இளைஞனுக்குள்ளும் (ஒவ்வொரு துறைக்கான) படைப்பாற்றல் உள்ளது. (அதைத் தெரிந்து கொண்டு – புரிந்து கொண்டு) அதைச் சரியாக- முறையாகப் பயன்படுத்துபவர்களே முன்னேறுகின்றனர்- வாழ்வில் சாதனை படைக்கின்றனர்; வரலாற்றில் இடம் பெறுகின்றனர்.

உன்னிடம் ஒரு திறமை இருக்கின்றது. என்பதை நீ கண்டறி. இப்படிக் கண்டறிந்தால் போதும், உலக அரங்கில் உன் திறமை ஒரு நாள் கண்டிப்பாகப் பேசப்படும்.

கல்வெட்டாக வரலாற்றில் பதிந்து கிடக்கும் சாதித்தவர்களின் வரலாறை தெரிந்து கொள்ளாத எவனுக்கும் சாதிக்கின்ற அந்த நம்பிக்கை வராது சாதிக்கவும் முடியாது.

அன்பு மிக்கவனே

நீ எதையும் சாதிக்கப் பிறந்தவன்

நீ எதையும் சந்திக்கப் பிறந்தவன்

நீ எதையும் சிந்திக்கப் பிறந்தவன்

நீ எதையும் முந்திக்கப் பிறந்தவன்

நீ எதையும் போதிக்கப் பிறந்தவன்

எதிலும் வெற்றி வாகை சூட வந்தவன்

நீ, எதற்கும் நாதியற்றவன் அல்ல.

இதுவரை உலகில் தோன்றி மறைந்தோர் எத்தனை கோடி பேர்,  தோன்றிய எல்லோருக்கும் வரலாறு  என்று ஒன்று இல்லை. இதில் சிலருக்கே உண்டு.

இந்த சரித்திரப்பட்டியல் நீதி- அநீதி என இருவகைப்படும். இதில், எதில் நீ இடம்பெறப் போராடிக் கொண்டிருக்கிறாய்? காந்தி இருக்கும் பெயர்ப் பட்டியிலிலா? கோட்சே இருக்கும் பெயர்ப் பட்டியலிலா?

உன்னைப் போன்றுள்ளவர்களின் சாதனைகளைச் கேசரிஇ அதுவே உனக்கு மிகப்பெரிய நம்பிக்கையைக் கொடுக்கும். அந்த நம்பிக்கையே உனது முன்னேற்றதுக்குத் தேவையானதாகவும், வாழ்வுக்கு அவசியமானதாகவும் இருக்கும்.

முடியாது என்கிற பேச்சசுக்கு இடம் கிடையாது என்று எப்பொழுதும் உன் இதயம் சொல்கிறதோ அப்பொழுதுதான் நீ நினைத்ததை முடிப்பவனாகத் திகழ முடியும்- திகழ்வாய். அப்படித் திகழும் போது தான் உலகம்  உன்னைப் புகழும்.

இந்த இதழை மேலும்

• இணையதளத்தில் படிக்க

நம் பயணங்களில் ஏற்படும் எதிர்பாராத நிகழ்வுகளைச் சமாளிக்க நம்மிடம் பொக்கிஷமான சில விஷயங்கள் இருக்கின்றன. அவைகளை நான் என் பயணங்களில் பயன்படுத்தி பலன் கண்டதை உங்களுக்கும் பயன்படும் என்று தெரிவிக்க இக்கட்டுரையை வரைகிறேன்.

நம் மலர் மருத்துவத்தில் ரெஸ்கிவ் ரெமடி (Rescue remedy) என்ற மலர் மருந்து நம் அவசரகால சூழல்களுக்கு நிவாரணியாக விளங்குகிறது. இந்த மலர் மருந்தானது ஐந்து மலர் மருந்துகளின் கலவையாகும். அந்த ஐந்து மலர் மருந்துகளின் பெயரும் அதன் பயன்பாட்டையும் முதலில் நாம் பார்ப்போம்.

செரி பிளம் (Cherry plum): இது நம் உடலின் வெப்பத்தைத் தனிக்கும் குணம் கொண்டது. தீக்காயங்கள் விரைவாக குணமாகவும் இது உதவியாக இருக்கும். தீ விபத்துக்கள் நம்மை பாதிக்காவண்ணம் பாதுகாக்கும் இறையாற்றலாக இது விளங்கும்.

கிளமேட்டிஸ் (Clematis): இது நம்மை மயக்கத்திலிருந்து மீட்டெடுக்கும். விபத்துக் காலங்களில் ஏற்படும் அதிர்ச்சியால் நாம் மயங்கி விழாது விழிப்பாக இருந்து செய்ய வேண்டியவற்றைச் செய்ய இம்மருந்து உதவும். நம் பயணங்களில் உணவு மூலம் அல்லது சுவாசம் மூலம் நம்முள் வரும் நச்சுக்களை வெளியேற்றி மயக்கம் ஏற்படாமல் பார்த்துக்கொள்ளும்.

மிமுலஸ் (Mimulus): பயணங்களில் ஏற்படும் காரணம் சார்ந்த பயங்களிலிருந்து நம்மை காக்கும் இறை சக்தியாக மிமுலஸ் மலர் மருந்து விளங்கும். விபத்து காலத்தில் ஏற்படும் உயிர் பயத்தை இம்மருந்து கணிசமாகப் போக்கி பயணங்களில் நம் உயிரைக் காக்கும்.

ராக் ரோஸ் (Rock Rose) : முந்தைய அத்தியாயத்தில் கூறியுள்ளதுபோல் எதிர்பாராது ஏற்படும் பேராபத்துக் களிலிருந்து நம்மைக் காக்கும் இறை சக்தியாக ராக் ரோஸ் விளங்கும். எதிர்பாராமல் நம் உடலில் சேரும் கடுமையான விஷங்களை வெளியேற்றும் சக்தி இம்மருந்திற்கு உண்டு.

ஸ்டார் ஆப் பெத்தலஹாம் (Star of Bethlam): இம்மலர் மருந்தானது எதிர்பாராத அதிர்ச்சியிலிருந்து நம்மைக் காக்கும் இறை சக்தியாக விளங்கும். விபத்துக்களால் ஏற்படும் அதிர்ச்சியிலிருந்து நம்மை மீட்டெடுக்கவும் இது உதவியாக இருக்கும்.

இந்த இதழை மேலும்

• இணையதளத்தில் படிக்க

ஆன்மிகம் என்பது ஆன்மாவுடன் தொடர்புடைய  விஷயங்களைக் குறிக்கிறது.  நமது வாழ்வில் ஆன்மீகத்தைப் பின்பற்றுதல் ஒரு பயனுள்ள செயல்பாடு ஆகும். சாத்தியமற்றதாக தோன்றும் அடைய முடியாத இலக்கை நிர்ணயிக்கும் போது இறைவனின் சந்நிதானத்திற்கு செல்கிறோம். பிரார்த்திக்கிறோம். வெற்றி வசப்படுமா? என்பது புரியாத புதிராக இருக்கிறது.

ஆன்மிக நம்பிக்கையுடன் களத்தில்  நிற்கிறோம். நம்மை வீழ்த்த நம்மைச் சுற்றி உள்ளவர்களே நமக்கு எதிராக நிற்கிறார்கள். அவர்களது வியூகங்களை எதிர் கொள்கிறோம். இடையூறுகளை தவிடு பொடியாக்குகிறோம். வெற்றியால் நாம் தலை நிமிரும் போது, அவர்கள் தலைகுனிகிறார்கள். தூரத்தில் பல்லாயிரம் பேர் கரவொலி எழுப்புகிறார்கள். நாம் வென்றாலும் தோற்றாலும் அவர்கள் அப்படித்தான்.

கனவை நனவாக்கிய இறைவனுக்கு நேர்த்திக்கடன் செய்கிறோம். மதம் வேறானதாக இருக்கலாம். கடவுள் வேறானதாக இருக்கலாம். வழிபாட்டு முறை வேறானதாக இருக்கலாம். சமய நூல்கள் வேறானதாக இருக்கலாம். நாம் செல்லும் பாதையோ ஆன்மிகம். நம்மைப் போன்றவர்கள் வழிபடுவதற்க்காகத்தான் உலகமெங்கும் ஆலயங்கள் புனிதத்தலங்கள் வியாபித்து இருக்கிறது.

இறை வழிபாடு மற்றும் ஆன்மிகம் புனிதமானது. நம் மனதில் உள்ள தீய எண்ணங்களை நமக்கு சுட்டிக்காட்டுகிறது. பிறருக்கு நன்மை செய்யா விட்டாலும், ஏன் தீமை  செய்ய வேண்டும் என வினாக்களை நம்மிடையே எழுப்புகிறது. நம் மனதில் உள்ள மாசுக்களை சுத்திகரிக்கிறது.

மனதில் வேறு பல சிந்தனைகளுடன் தினம் பல மணி நேரம் பூஜை செய்வதைக் காட்டிலும், வாரம் ஒரு முறையோ, அல்லது மாதம் இரு முறையோ, தவறாமல் குறிப்பிட்ட தினத்தில், குறிப்பிட்ட நேரத்தில் ஆலயம் செல்வது, இறைவனிடம் நமது கனவுகளை மனதிற்க்குள் உரக்கச் சொல்வது ஒரு நாள் மிகவும் பலனளிக்கிறது. கனவு நனவாகிறது.

இறைவனது சந்நிதானத்தில் எவ்வித சிந்தனையுமின்றி அனைத்தும்  நீயாக இருக்கிறாய். இந்த உடலை நீயே வழிநடத்தி  செல் என சரணடைகிறோம். நமது கடமைகளை மிகச் சரியாக செய்வது மட்டுமே நமது பணி. பலனை இறைவனிடம் விட்டு விடுவதாகும்;.

எந்த செயல் செய்தாலும், அது அவனால்தான் செய்யப்படுகிறது என்ற நினைவுடன் செய்து அந்த செயலின் பலனை இறைவனுக்கு சமர்ப்பனம் செய்து வாழ்ந்து வந்தால் அதுவே உச்சக்கட்ட ஆன்மிகமாகும்.

கடவுள் அனைத்திலும் இல்லை. ஆனால், அனைத்துமே கடவுளாக இருக்கிறார்;. பிரச்சனை, கஷ்டங்கள், சிக்கல்கள் இல்லாத மனிதர்களே இல்லை. அவற்றிற்கு தீர்வு புலப்படாத போது, ஆலயத்திற்கு செல்கிறோம். எவ்வித பிரதி பலனும் பாராமல் நம்மை சுற்றி உள்ளவர்களுக்கு நம்மால் இயன்ற உதவியை செய்து,  வாழ்ந்து வந்தால் மிகச்சரியான பாதையில் இறைவனை நாம் நெருங்கிக் கொண்டு இருக்கிறோம் என்று பொருள்.

நமது நற்பண்புகளை வெளிக்கொணர்வதற்கு ஆன்மிகம் உதவியாக உள்ளது. நமது இலக்கை அடைவதற்கு, நமது கனவு நனவானதற்கு, நம் லட்சியம் கைகூடியதற்கு, நமது இன்னல்கள் களைந்ததற்கு ஆன்மிகம் தான் காரணம் என்கிறோம். அதை ஆதாரப் பூர்வமாக நீருபிக்க இயல்வதில்லை.

இந்த இதழை மேலும்

• இணையதளத்தில் படிக்க

கோவை வேளாண் பல்கலைக்கழகத்தின் 49 ஆம் ஆண்டு நிறுவன தினத்தை முன்னிட்டு வேளாண் விஞ்ஞானிகளுக்கு விருதுகள் வழங்கி கௌரவிக்கப்பட்டது. அதில் மூலக்கூறு இனப்பெருக்கத் துறையில் பணியாற்றி வரும் பேராசிரியர் டாக்டர் செந்தில் நடேசன் தாவர மூலக்கூறு அறிவியல் உதவியுடன் புதிய ரகங்களை உருவாக்கியதன் மூலம் அவருக்கு இவ்விருது வழங்கி கௌரவிக்கப்பட்டன.

இவர் 1995 ஆம் ஆண்டிலிருந்து இத்துறையில் பணியாற்றி வருகிறார், பல்வேறு சிறுதானிகளின் புதிய ரகங்களை உருவாக்குவதில் தன்னை முழுமையாக ஈடுபடுத்திக் கொண்டு இத்துறையில் பல்வேறு சாதனைகள் புரிந்து வருகிறார். மூலக்கூறு இனப்பெருக்கத் துறைக்காக ஜப்பானில் பயிற்சி பெற்றவர். மேலும் முதுமுனைவர் (POST DOCTORAL FELLOWSHIP) பட்டத்தையும் ஜப்பானில் பெற்றவர்.  மூலக்கூறு இனப்பெருக்கத் துறையில் ஆராய்ச்சி செய்ய ஜெனோமிக் ஆய்வகத்தை நிறுவினார்.

வைட்டமீன் ஏ குறைபாடு பிரச்சனையைத் தீர்க்க பீட்டா கரோடீன் மக்காச்சோள கலப்பினங்களை உருவாக்கும் நோக்கத்தில் பயோஃபோர்டிஃபிகேஷன் என்னும் திட்டத்தில் பணியாற்றி வருகிறார்.

மதுரை வேளாண் கல்லூரியில் 50 வது ஆண்டு நிறைவு முன்னிட்டு நிறைவு போது உயிர்தொழில் நுட்ப துறையின் தலைவராகவும், புத்தாக்க மையத்தின் திட்ட இயக்குநராகவும் பணியாற்றினர்.  இவர் தாவர மூலக்கூறு உதவியுடன் புதிய ரகங்களை கண்டுபிடித்தார். இந்த தனித்துவமிக்க சாதனையை பாராட்டி பல்கலைக்கழக நிறுவன தினத்தின் அன்று இவருக்கு இவ்விருது வழங்கி கௌரவிக்கப்பட்டது. இவ்விழாவில் தேசிய மானாவாரி ஆணையர் டாக்டர் அசோக் தல்வாய் மற்றும் வேளாண் பல்கலைக்கழகத் துணைவேந்தர் டாக்டர் என். குமார் ஆகியோர் கலந்து கொண்டு சிறப்பித்தார்கள். மிகப் பிரமாண்டமாக நடைபெற்ற இவ்விழாவில் 25 வேளாண் விஞ்ஞானிகளுக்கு விருது வழங்கப்பட்டது.

ஏன் ஆண்கள் பொய் சொல்கிறார்கள் & பெண்கள் அழுகிறார்கள்?

(Why men Lie and Women Cry) 

இந்த நூலை ஆலன் மற்றும் பார்பராபீஸ் (Allan & Barbara Peace) ஆகிய இருவர் எழுதியிருக்கிறார்கள். (இந்நூலினைத் தமிழில் ஜார்கினா குமார் மொழிபெயர்த்துள்ளார். கண்ணதாசன் பதிப்பகம் வெளியிட்டுள்ளது.) இந்நூலாசிரியர்கள் இருவரும் உளவியலில் மருத்துவப் பட்டம் பெற்ற கணவன் மனைவி ஆவர். இவர்கள் உலகம் முழுவதும் 20 ஆண்டுகளுக்கு மேல் சுற்றிவந்து ஆண், பெண் உளவியலை ஒரு கோட்பாடாக்கித் தந்துள்ளனர். இந்நூல் முன்வைக்கும் கருத்துக்கள் முழுவதும் அறிவியல் ரீதியானதாகும். இந்நூலில் முன் வைக்கப்படும் கருத்துக்கள்.

• ஆண்கள் ஏன் காதலைப் பற்றி மிகவும் குழப்பமடைகிறார்கள்?
• ஏன் பெண்கள் பேசிக்கொண்டேயிருக்கிறார்கள்?
• ஏன் பெண்கள் சுற்றி வளைத்தே பேசுகிறார்கள்?
• ஏன் பெண்கள் அழுதுகொண்டே இருக்கிறார்கள்?
• ஆண்கள் ஏன் பொய் பேசுகிறார்கள்?
• உறவுகளில் உறுதியாக ஒன்றைச் சொல்ல ஆண்கள் ஏன் தயங்குகிறார்கள்?

போன்ற கருத்துக்களை ஆய்வுநோக்கில் அலசிப் பார்த்து ஆண், பெண் இருவரின் மனநிலை என்ன? என்பதை இந்நூல் மிக அற்புதமாக விவரிக்கின்றது. இந்நூல் முன்வைக்கும் முதல் கருத்து ஆண் வேறு, பெண் வேறு என்பது மட்டுமல்ல. இருவரும் வேறுபட்ட சிந்தனையுடையவர்கள். இவர்களுக்குள் ஒத்த சிந்தனை என்பது எப்போதும் ஏற்படாது. ஆணின் மூளை வேறு? பெண்ணின் மூளை வேறு? ஆணின் மூளை உணர்வுகளின் அடிப்படையில் இரண்டு பகுதிகளாக வலது மூளை, இடது மூளை என்ற பிரிவு மட்டுமே உண்டு. இடது மூளை பேசுவதையும், வலது மூளை அதற்கான தீர்வுகளை ஆராய்வதையும் செய்யும். பெண்களைப் பொறுத்தவரை இடது, வலது என்ற இரண்டு மூளைகளிலுமே 20 பகுதிகள் உள்ளன. ஒரு அஞ்சறைப் பெட்டி போன்று; அவள் ஒரே நேரத்தில் பேசவும், அழவும், உணர்ச்சிவசப்படவும், சிரிக்கவும் என்று உணர்வுகளை மாற்றி மாற்றி தன்னை வெளிப்படுத்த முடியும். ஆண் அப்படி அல்ல! அவனால் ஒரு நேரத்தில் ஒன்றை மட்டுமே செய்ய முடியும். ஒரு பெண்ணால் ஒரே நேரத்தில் சுய நினைவுடன் ஒன்பது வேலைகளைச் செய்ய முடியுமென்று இந்நூலாசிரியர்கள் சொல்கிறார்கள். ஒரு பெண் மூளையால் ஒரு நாளைக்கு 6000 முதல் 8000 வரை சொற்களைப் பேசி வெளியிட முடியும். ஒரு ஆனால் அதிகபட்சம் 2000 முதல் 4000 வரை சொற்களைத்தான் பேச முடியும். பெண்ணின் பேச்சுத்தனம் மூளையில் பெரியது; ஆணின் பேச்சுத்தனம் மூளையில் சிறியது. இரண்டு பெண்கள் ஒன்றாக ஒரு நாள் முழுவதும் தொடர்ந்து அருகருகே அமர்ந்து பேசிக் கொண்டிருந்துவிட்டு, வீட்டுக்குச் சென்று மீண்டும் தொலைபேசியில் தாம் விட்டதிலிருந்து பேசத் தொடங்குவார்கள். ஒரு ஆண் இதனைப் பார்த்துக்கொண்டே இருந்துவிட்டு இவ்வளவு நேரமா நீங்கள் இருவரும் பேசிக்கொண்டுதானே இருந்தீர்கள். மறுபடியும் என்ன? போனில் பேச்சு? என்று கேட்டு விட முடியாது. காரணம் அவளால் ஒரு நாளைக்கு 8000 க்கு மேலான சொற்களையும், உரையாடல்களையும் பேசாமல் இருக்க முடியாது. ஏனென்றால் அவர்களின் மூளை வடிவமைப்பு ஆதிகாலந் தொடங்கியே அப்படியாகிவிட்டது.

ஆதிகாலத்தில் பெண்கள் குகைகளில் வாழும்போது தங்கள் குழந்தைகளுடனும்; தங்கள் குழுக்களுடனும்; உணவு தேடச் சென்ற ஆண்கள் திரும்பி வரும்வரை அவர்கள் குறித்தோ! தங்கள் வாழ்க்கை குறித்தோ பேசிக்கொண்டேயிருந்தனர். ஓர் ஆண் உணவைத் தேடுபவன். பிரச்சினையைத் தீர்ப்பவன். அவன் உயிர் வாழ இவைதான் முக்கியமானவை. ஒரு பெண் கூட்டைக் காப்பவள், அடுத்த தலைமுறைக்காக உயிர் வாழ்வதை உறுதி செய்வதுதான் அவளது கடமை. ஒவ்வொரு சிறிய விஜயத்தைப் பற்றியும் அவள் தொடர்ந்து பேசுவதற்கான காரணம், அவளது வாழ்க்கையே அந்தச் சிறிய விஜயங்களின் ஒரு கூட்டுத் தொகுப்பாக ஆகிவிட்டதுதான். பிள்ளைகள், அவர்களின் பிரச்சினைகள், அவர்களின் எதிர்காலம், தன்நிலை, தனது எதிர்காலம் என்று அவள் ஆணைத் தூண்டுகிறாள். ஆண் அவளைப் போன்று பேசமுடியாமல்; தன் வேலை என்றே குறியாக இருக்கின்றான். ஆண் உணவு தேடுபவன் என்பதால் வேட்டையில் ஈடுபட்ட ஆண் குழுக்களுக்கிடையே பேச்சுக்கு இடமில்லை. அவர்கள் ஒரு விலங்கு அகப்பட நாள் கணக்கில் பாறை மீதோ, மரத்தின் மீதோ அமர்ந்து கண்காணித்து வேட்டையாட வேண்டும். இல்லையென்றால் அன்று அவர்களுக்கும் அவர்களின் குடும்பத்திற்கும் உணவு இல்லை. இதனடிப்படையில் ஆணின் பேச்சுத்தளம் மூளையில் குறைவாகவே அமைந்துவிட்டது. இங்கே ஆணுக்காகவும் சேர்ந்து பெண்ணே பேசுகின்றாள். போனவன் வருவானா? அவனுக்கு ஏதேனும் தீயது நடந்திடுமா? அப்படி நடந்தால் நம் கதி? குழந்தைகளின் கதி? என்று புலம்புகின்றாள். ஆண் இந்த நேரத்தில் வருவதாகச் சொல்லிச் செல்கின்றான். அவனால் தான் சொல்லிய நேரத்தில் உடனடியாக வீடு திரும்ப முடிவதில்லை. இதனால் ஆண் தாமதத்திற்கான காரணத்தை விளக்க நிறைய பொய் சொல்ல வேண்டியிருக்கின்றது. இவன் பொய் பேசுகின்றான் என்பதைப் பெண் அறிகையில் அவள் அழுகின்றாள். பெண் பேசுவதற்கும், அழுவதற்கும் காரணங்கள் தேவையே இல்லை. அவள் நினைத்தால் அழுதிட முடியும்.

பெண்கள் ஏன் இவ்வளவு அதிகமாகப் பேசுகிறார்கள், அதுவும் பெரும்பாலும் நேரடியாகப் பேசாமல் சுற்றிவளைத்துப் பேசுகிறார்கள். அவள் குழந்தை பெறுபவளாகவும், கூடுகளைக் காப்பாற்றுபவளாகவும் பரிணமித்து உருவெடுத்துள்ளாள். இதன் விளைவாக, பெண்களின் மூளைகள், தம் வாழ்வில் உள்ளவர்களைக் கவனித்துப் பேணவும், உணவூட்டவும், அன்பும் அக்கறையும் செலுத்தவும் ஏற்றவாறு வடிவமைக்கப்பட்டு உள்ளன. ஆண்களோ ஒரு முற்றிலும் வேறுபட்ட பணிக்கென உருவெடுத்தனர். அவர்கள் வேட்டையாடுபவர்களாக, விரட்டுபவர்களாக, பாதுகாப்பவர்களாக, பொருள் ஈட்டித் தருபவர்களாக,, பிரச்சினைகளுக்குத் தீர்வு காண்பவர்களாக வடிவெடுத்துள்ளனர்.

ஒரு பெண் மூளை ஒரே சமயத்தில் பல்வேறு விஜயங்களில் ஈடுபடுவதற்கெனப் பிரத்யேகமாக வடிவமைக்கப்பட்டுள்ளது. ஒரே சமயத்தில் நான்கு அல்லது ஐந்து பந்துகளை அவளால் காற்றில் வீசியெறிந்து விளையாட முடியும். ஒரு கம்ப்யூடடர் புரோகிராமை ஓடவிட்டுக் கொண்டே. தொலைபேசியில் பேசிட முடியும். அதேவேளையில் தனக்குப் பின்னால் என்ன உரையாடல் நடைபெற்றுக் கொண்டிருக்கின்றது என்றும் கவனிக்க முடியும். ஒரே ஒரு உரையாடலில் பல தொடர்பற்ற விஜயங்களைப் பற்றி அவளால் பேச முடியும். அவ்வாறு பேசும்பொழுது விஜயங்களை மாற்றுவதற்கோ அல்லது தான் கூறும் கருத்தை வலியுறுத்துவதற்கோ அவளால் ஐந்து குரல் ஒலிகளை மாற்றி மாற்றிப் பயன்படுத்த முடியும். இவற்றுள் மூன்றே மூன்று ஒலிகளை மட்டுமே ஆண்களால் அடையாளம் கண்டுகொள்ள முடியும். இதன் விளைவாக, பெண்கள் பேசுவதைக் கவனிக்கும்பொழுது அவர்கள் மையக் கருத்தைப் பல சமயங்களில் ஆண்கள் கோட்டைவிட்டு விடுகின்றனர்.

பெண் கேட்கும் கேள்விக்கு ஆண் ஆம் அல்லது இல்லை என்று பதில் சொல்வான். ஆனால் பெண்கள் விரிவான அவர்கள் எதிர்பார்க்கிற விளக்கங்களை ஆண் விவரிக்க வேண்டுமென்று எதிர்பார்க்கின்றனர். இது நடைபெறாமல் போகையில் பெண் அழுகின்றாள். ஆண் செய்வதறியாது திகைத்துப் போய் அமைதியாகி விடுகின்றான். இந்த நூல் முன்வைக்கும் கருத்து ஆண் வேறு பெண் வேறு என்பதே.

ஆண் வேறு! பெண் வேறு!

ஆண்களின் மூளைகள் தீர்வை மையம் கொண்டவை. பெண்களின் மூளைகள் செயல்பாட்டை மையம் கொண்டவை. ஒரு பெண் பேசுவதற்கான முக்கியக் காரணம் பேசுவது மட்டுமே. தனது அன்றைய தினத்தைப் பற்றி உங்களிடம் பேசுவதும், உங்களுடன் ஒரு பிணைப்பை ஏற்படுத்திக் கொள்வதும் தானே தவிர, அவள் பேசுவதற்குத் தீர்வு வேண்டி அவள் பேசுவதில்லை. ஆண் அங்கு என்ன பேசுகிறான் என்பது முக்கியமல்ல. அவன் பங்கு கொள்வது மட்டுமே முக்கியம். பெண்கள் சராசரியாக ஆண்களை விட ஏழு ஆண்டுகள் அதிகமாக வாழ்கிறார்கள். இதன் காரணம் அவர்களால் அழுத்தத்தை நன்றாகச் சமாளிக்க முடிவது தான். ஆண்கள், பெண்கள் இருவருமே மிகைப்படுத்துகிறார்கள். வேறுபாடு என்னவென்றால் ஆண்கள், உண்மைகள், புள்ளி விபரங்கள் இவற்றை மிகைப்படுத்துகிறார்கள். பெண்களோ உணர்ச்சிகளை மிகைப்படுத்து கிறார்கள். ஆண்களின் மூளைகள் பிரச்சினைகளைத் தீர்ப்பதற்கென உருவானவை! பெரும்பாலான ஆண்கள் சொல்வதற்கு ஏதாவது இருந்தால் மட்டுமே பேசுவார்கள். இது பெண்களிடம் பேசும் பொழுது தீவிரமான பிரச்சினைகளை ஏற்படுத்துகிறது. ஏனெனில் பெண்களின் ‘பேச்சு’ முற்றிலும் வேறுபட்டது. பெண்களின் பேச்சு, ஒரு பரிசாகவும், மற்றொரு நபருடன் தொடர்பும் பிணைப்பும் ஏற்படுத்திக் கொள்வதற்காகவும் பயன்படுத்தப்படுகிறது. சாதாரணமாகச் சொல்வதானால் அவளுக்கு உங்களைப் பிடித்திருந்தால் அல்லது அவள் உங்களை நேசித்தால், நீங்கள் சொல்வது ஏற்றுக் கொள்ளத்தக்கதாக இருந்தால், நீங்கள் ஏற்றுக் கொள்ளப்பட்டவராக, முக்கியமானவராக இருப்பதாக உங்களை உணரச் செய்ய விரும்பினால், அவள் உங்களிடம் பேசுவாள். அவளுக்கு உங்களைப் பிடிக்கவில்லை என்றால், அவள் பேசமாட்டாள்.

ஆண்கள் தெளிவான உத்தரவுகளை விரும்புகிறார்கள். ஆண்களைப் பொறுத்தவரையில் நேரடிப் பேச்சு மிகச் சரியானது. ஏனெனில் அவர்கள் அவ்வாறு தான் கருத்துத் தொடர்பு கொள்கிறார்கள். சுமார் நூறாயிரம் ஆண்டுகளாக ஆண்கள் காலையில் எழுந்து தமது குடும்பத்தினருக்கு உணவு தேடி வெளியில் சென்றுள்ளனர். மனித குலம் உயிர் வாழ்வதற்கு ஆணின் பங்களிப்பு வெகு தெளிவாகவும், எளிமையானதாகவும் இருந்து வந்துள்ளது. ஒரு உண்ணப்படக்கூடிய இலக்கைக் கண்டுபிடித்து அதை அடித்து வீழ்த்துவதாகும். இதன் விளைவாக அதை மட்டுமே வெற்றிகரமாகச் செய்வதற்காகச் சிறப்பாக உருவமைந்துள்ள சில பகுதிகளைக் கொண்டு அவனது மூளை வளர்ந்துள்ளது. அதற்கு காட்சி – இடைவெளிப் பகுதி என்ற பெயர். இது மேகங்கள், கோணங்கள், தூரங்கள் மற்றும் இடைவௌல் பற்றிய தொடர்பற்ற விஜயங்களை அளக்கப் பயன்படுகிறது. இதே பகுதிதான் நாகரீக ஆண்களால், காரைப் பின்னால் திருப்பி இணையாக நிறுத்துவதற்கும், வரைபடங்களை வாசிப்பதற்கும், ஒரு சாலையில் ஏற்கெனவே சென்று கொண்டிருக்கும் வண்டிகளுடன் இணைந்து கொள்வதற்கும், பந்து விளையாடவும், குறி வைத்து அடிக்கவும் பயன்படுத்தப்படுகிறது. சாதாரணமாகச் சொல்வதானால் இது மூளையின் வேட்டையாடும் பகுதியாகும். பல்லாயிரக்கணக்கான ஆண்டுகளாக ஒரு ஆணின் பணி குறிப்பாக வேட்டையாடுவதாகும். பெண்கள் கூடுகளைப் பாதுகாப்பவர்களாகப் பரிணமித்து வளர்ந்துள்ளனர்.

உணர்ச்சிவசப்பட்ட பெண் நிதானமாக அதைப் பற்றி பேசுவதையே விரும்புவாள். ஒரு பெண் உணர்ச்சியோடு பேசும் போது அவள் வெளிப்படையான முக பாவங்களை, உடல் அசைவை, பல்வேறு தொனிகளை வெளிப்படுத்துவாள். தன் உணர்வுகளை வெளிப்படுத்தும் ஆண் ஒரு பாம்பைப் போல சீறுவான், வார்த்தைகளைக்கொட்டுவான், முரட்டுத்தனமாக நடந்துகொள்வான். ஒரு பெண் தன் உறவுகளில் சந்தோஷமின்றி இருந்தால் அவளால் தன் வேலையில் கவனம் செலுத்த முடியாது. ஓர் ஆண் தன் வேலையில் சந்தோஷமின்றி இருந்தால் அவளால் தன் உறவுகளில் கவனம் செலுத்தமுடியாது. உலகெங்கும் உள்ள ஆண்களில் 70-80% தங்கள் வேலைதான் தங்கள் வாழ்வின் மிக முக்கியமான பாகம் என்று கூறுகிறார்கள். 70-80% பெண்கள் தங்கள் குடும்பம் தான் தங்கள் வாழ்வின் மிக முக்கியமான பாகம் என்று கூறுகிறார்கள். இதன் பலனாக மன அழுத்தமுள்ள சிக்கலான சூழலில் தனது கணவனுடன் பேசி நேரம் செலவழிப்பதை ஒரு பரிசாக பெண் கருதுவாள். ஆனால் ஓர் ஆண் அதையே பிரச்சினையைத் தீர்க்கச் செய்யும் முயற்சியில் ஒரு தடையாகக் கருதுவான். பேசி, அணைக்க அவள் விரும்புவாள். அவன் கால்பந்து விளையாட்டை இரசிக்க விரும்புவான். அவனது மூளை ஒரு பிரச்சினையைத் தீர்க்கும் எந்திரம். அது எப்போதும் ஓய்வெடுப்பதில்லை. ஒரு மருத்துவமனைக் கட்டிலில் அவன் சாகக்கிடந்தால் கூட இயற்கையான வெளிச்சத்தைப் பெறவும் ஜன்னல் வழியே வயல்வெளியைப் பார்க்கவும் அறையை மாற்றி அமைக்கும் முறைகள் பற்றித்தான் யோசிப்பான். ஆணும் பெண்ணும் வேறு வேறு. மேலானவர்களோ கீழானவர்களோ அல்ல – வேறுபட்டவர்கள் அவ்வளவுதான். விஞ்ஞானத்திற்கு இது தெரியும் என்று இந்நூல் நிறைவுபெறுகிறது. ஆண், பெண் இருவரின் குணநலன்களைத் தெரிந்து நெளிவு சுளிவுடன் வாழ இந்நூல் கட்டாயம் துணைசெய்யும் என்று நான் உறுதி கூறுகின்றேன்.

–    வாசிப்புத் தொடரும்…[/hide]

இந்த இதழை மேலும்

• இணையதளத்தில் படிக்க